蝦子柚皮

蝦子柚皮 - 是一種非常傳統的食品,低成本, 無膽固醇, 高纖維, 可口美味, 功夫雖多, 但一次過煮多點,放入冰箱內可隨時取出來享用.若然煮得成功,親友一定讚不絕口.

材料 : 柚皮(有中國(皮身厚點),有泰國(皮身薄些少),四至五個(鉋去綠色部份),蝦子三至四茶匙,蠔油兩湯匙,大地魚一隻,紹興酒一茶匙半,白酒兩茶匙,五至六片薑片,二個乾蔥頭片,三至四粒蒜片,老抽一茶匙半,糖一茶匙,鹽,雞粉和楜椒粉各少許.

做法 : 柚皮去綠色部份後,放入熱水內浸上三小時,取出瀝(渣)乾水份,再浸回熱水中至涼,再瀝(渣)乾水份,用鑊煮滾水,加入柚皮滾大約十幾分鐘,取出渣乾水份,(不用切,整塊)待用,白鑊一隻(即不加油和任可東西),好慢火加入蝦子炒香,倒入紹興酒一同炒至乾爽,留用,大地魚焗或烤香,弄碎待用.

鑊下油(大約三湯匙),轉中大火,加入薑片和乾蔥頭片爆香,隨後加入蒜片炒一兩下,加入柚皮兜幾下,加水至未過面,洒上大地魚碎,水滾後慢火炆四十至五十分鐘,熄火取走柚皮(小心魚骨黏著柚肉),用隔器隔去渣滓,上湯備用,柚皮回鑊倒入上湯,加入一茶匙蝦子,白酒,蠔油,老抽,糖,鹽,雞粉少許楜椒粉,慢火炆三十五分鐘.食時再加入一茶匙蝦子,切件或整片上碟.

後話 : 蝦子柚皮,煮多點可儲存放在冰箱內,隨時可用作加菜,連汁液一同儲存,最好的方法,就是連煲放入雪櫃內,第二天汁液黏在柚皮上,包起上來比較容易處理,一至二件用保鮮紙包好放入盒內,用時取出. 蝦子炒多用不完,用小樽入好放在雪櫃,可作其他途 .

蒜片不能太早下鑊,因容易焦焦.